Dy deklarata të forta janë bërë sot në arenën publike shqiptare, njëra nga ambasadori amerikan Donald Lu, dhe tjetra nga Prokuroria e Përgjithshme. Ambasadori e ka akuzuar Kryeprokurorin se është përpjekur ta pengojë Reformën në Drejtësi, çka indirekt, e akuzon Llallën për bashkëpunim me botën e krimit dhe korrupsionit që dihet se ndikon fuqishëm gjyqsorin dhe politikën në Shqipëri. Ambasadori ka rreshtuar nje seri veprimesh të prokurorëve, që sipas tij, vërtetojnë qëllimet sabotuese të institucuionit që Llalla drejton ndaj Reformës në Drejtësi. Ambasada amerikane i ka revokuar vizën Kryeprokurorit Llalla, dhe 30 prokurorëve e gjyqtarëve të tjerë.
Reagimi i pokurorit të përgjithshëm ka ardhur vetëm pak kohë më pas. Prokurori, përmes shefes së kabinetit e akuzon ambasadorin për shantazhe të vazhdueshme, ndaj prokurorit të përgjithshëm dhe për “presione tipike sorosiane”. Këto shantazhe, sipas prokurorisë ambasadori i ka kryer për fitime personale. Prokuroria e shigjeton ambasadën amerikane duke thënë se u ka hequr vizën edhe prokurorëve që po hetojnë politikanë, sipas prokurorisë, të afërt me ambadadorin, por edhe me botën e krimit. Në fund, prokuroria ka paralajmëruar për hetime të cilat përfshijnë këta politikanë, refren që duhet të themi, është përsëritur prej shumë vitesh.
Megjithatë, dita e sotme ka shënuar momentin më të tensionuar midis prokurorisë dhe ambasadës amerikane. Publiku e di se edhe pse nuk thuhet me zë të lartë, ka një ndarje politike midis atyre që e kanë përkrahur, apo i janë nënshtruar reformës në drejtësi, dhe atyre që e kanë kundërshtuar këtë në të gjitha hallkat e procesit. Së paku sa i përket reformës, që është pika kryesore në axhendën e ambasadorit Lu, ky i fundit ka një dakordësi dhe mirëkuptim me Kryeministrin, ndërsa ka patur marrëdhënie më të vështirë me Partinë Demokratike, dhe faktorët e tjerë politikë.
Citime:
Nëse ne, shoqëria civile, partnerët ndërkombëtarë dhe media nuk jemi sy shqiponja, politikanë, gjykatës dhe prokurorë të korruptuar dhe krerë të krimit do të përpiqen të vjedhin zgjedhjet, reformën në drejtësi dhe gjithcka etjetër në ekonominë e vendit. Po shohim njerëz të fuqishëm që po përpiqen të ruajnë kontrollin e tyre mbi gjykatën dhe prokurorinë. Shembulli më i fundit për këtë është veprimi i Prokurorit të Përgjithshëm të Shqipërisë. Për më shumë se 18 muaj ai ka folur me zë të lartë kundër reformës në drejtësi. Në muajt nëntor dhe dhjetor prokurorët u përpoqën dhe dështuan të sekuestronin serverin e kompjuterave të ILDKPI që është jetik për vettingun. të premten e shkuar u hodh shorti për anëtarët e Këshilli të Emërimeve në Drejtësi një prej institucioneve të reja që mbron pavarësinë e gjyqësorit. Shorti u drejtua sic duhet nga sekretari i përgjithshëm i kuvendit, por Prokurori i Përgjithshëm dhunoi frymën e Kushtetutës duke dërguar një listë me 3 prokurorë për të plotësuar 3 pozicione”. - Donald Lu
“Rasti më flagrant, i cili është i dokumentuar me shkresë zyrtare, i bërë publik edhe në media, i referohet ndërhyrjes së drejtëpërdrejtë të ambasadorit të SHBA në Tiranë në hetimin që Prokuroria e Rrethit Gjyqësor Fier nisi ndaj kompanisë së naftës “Bankers Petroleum”. Kjo kompani akuzohej nga mediat dhe banorët e zonës ku ushtron aktivitetin se u kishte sjellë dëme të pariparueshme në pasuritë dhe shëndetin e tyre. Për këtë rast, ambasadori Lu ka kërkuar, në kundërshtim me çdo lloj komunikimi diplomatik dhe ligjor, që hetimi të mos vijonte, pasi pasojat do të godisnin në mënyrë të drejtëpërdrejtë Prokurorin e Përgjithshëm”. - Prokuroria e pergjitheshme