Pothuajse një e treta e popullsisë në botë është tashmë e ekspozuar ndaj kushteve klimatike që prodhojnë valë vdekjeprurëse të nxehti, pasi grumbullimi i gazeve serë në atmosferë e bën pothuajse të pashmangshme që zona tepër të mëdha të planetit të përballen me viktima prej temperaturave të larta.
Camilo Mora, një akademik në Universitetin e Hawaii dhe autori i këtij studimi të fundit mbi ndryshimet klimatike thotë se rreziku ndaj valëve të të nxehtit është zgjeruar në shkallë botërore, dhe deri në fund të shekullit rreth gjysma e popullsisë do vuajë prej vapës vdekjeprurëse.
Temperaturat e larta ‘po pjekin’ zona të mëdha në Amerikën jug-perëndimore, teksa të hënën në Phoenix, Arizona temperaturat arritën 48.3 gradë celsius, ndërsa në Palm Springs, Kaliforni rreth 46 gradë.
Studimi i Camilo Mora tregon se shkalla e vdekjeve prej të nxehtit është rritur vazhdimisht në mënyrë të qëndrueshme, teksa 30% e popullsisë kalon të paktën 20 ditë në vit me temperatura të papërballueshme për njeriun.
Studimi i publikuar në Nature Climate Change, ka analizuar më shumë se 1.900 raste viktimash të lidhura me valët e të nxehtit në 36 vende gjatë 4 dekadave të fundit. Këtu përfshihet vala e të nxehtit në Europë në 2003, që solli zjarre nëpër pyje në shumë vende, dhe rreth 20.000 veta vdiqën. 10.000 njerëz të tjerë vdiqën në Moskë si pasojë e temperaturave përcëlluese në 2010. Në 1995, Çikago vuajti prej një të nxehti të llahtarshëm për plot 5 ditë dhe më shumë se 700 persona gjetën vdekjen.
Mora shpjegon se një faktor kritik është edhe kombinimi i lagështisë me nxehtësinë. “Djersa juaj nuk avullon kur moti është i lagësht, kështu që nxehtësia grumbullohet brenda trupit tuaj. Më pas njerëzit vuajnë prej helmueshmërisë nga nxehtësia, gjë e njëjtë sikur t’ju djegë dielli brenda trupit. Gjaku shkon drejt lëkurës që t’ju ftohë dhe kështu organet do të kenë më pak gjak. Të vdesësh në një një valë të nxehti është si të të gatuajnë shumë ngadalë brenda një furre, është torturë e vërtetë” – shpjegon Camilo Mora.