Fatos Lubonja i thotë gjërat siç i mendon dhe kjo e ka bërë të humbasë shumë miq në politikë. Ndonjëherë opinionet e tij janë kontroverse, sidomos mbi tema si nacionalizmi, ç’ka shkakton pakënaqësi ndër disa njerëz. Megjithatë, kjo aftësi e Fatos Lubonjës për të thënë mendjen e vet, edhe kur e di se nuk do u pëlqejë disave, e bën atë një kandidaturë të papritur dhe interesante për President i vendit.
I kontaktuar nga peshkupaujë.com, lidhur me propozimin e bërë nga qytetarët për ta bërë President të vendit, Lubonja thotë se do ta pranonte propozimin aq kohë sa ky vjen nga publiku dhe nuk është pjesë e planeve të Ramës, Metës apo Bashës. Ai dëshiron të nënvizojë që nuk do bëhej kurrë pjesë e një loje të tillë. Gjithësesi duket si një mision tepër të vështirë që në ambientin politik shqiptar, një njeri që i akuzon partitë si banda, të bëhet president.
“Nga njëra anë dihet që pozicioni im ka qenë që kam kritikuar vazhdimisht këto parti si banda, edhe duhet një marrëveshje shumë e madhe të arrish të bëhesh nga një kontestues i bandave në një njeri që përfaqëson bandat, është problem. Në këtë kuptim, vetëm në qoftë se ka një zhvillim, siç thashë, i një qeverie të vullnetit të mirë për të ndryshuar Shqipërinë, mund të të fuste në këtë lojë”, ka thënë ish i burgosuri politik për News24.
Posti i Presidentit në Shqipëri vuan, në sytë e publikut, kontrollin total të politikës në përzgjedhjen e Qytetarit të parë. Presidenti, përveçse është zhveshur nga fuqitë që posti mbante dikur, ka humbur edhe rolin honorifik, aq kohë sa zgjedhja e tij bëhet në dhoma të mbyllura. Kështu, shqiptarët sot, në prag të zgjedhjes së Presidentit të ardhshëm, nuk kanë një ide se kush mund të jetë individi që kënaq orekset e kryetarëve e mazhorancës. Nëse do të përzgjidhet si deri tani, që ngjan me zgjedhjen e një gjelideti të therur e pendëshkulur, ky institucin do vuajë stigmën e pupacit. Në një Shqipëri më të mirë, presidentin nuk e zgjedhin tre burra që mezi durojnë njëri tjetrin.
E duke qënë se Presidentit tek ne i ka mbetur vetëm fjala, Lubonja mund të ishte kandidati që fjalën e ka të pushtetshme.
Blendi Salaj
peshkupaujë.com
Kopjimi i pjesshëm apo i plotë i këtij shkrimi pa lejen e shkruar të autorit nuk lejohet. Në rast se e kopjoni pa leje, duhet ta dini se jeni duke na dëmtuar.
