Shumë udhëheqës botërorë reaguan mbrëmjen e mbrëmshme pas deklarimit nga ana e Presidentit amerikan Donald Trump se Shtetet e Bashkuara po tërhiqeshin nga Marrëveshja e Parisit për luftimin e ndryshimeve klimaterike, por ajo që ka tërhequr më shumë vëmendje ishte përgjigja e Presidentit të ri të Francës, Emanuel Macron. Macron ka folur në anglisht dhe jo frengjisht dhe ka kërkuar nga të gjithë mbështetësit e marrëveshjes të jenë të bindur se marrëveshja për ruajtjen e Planetit do të mbetet në zbatim, edhe me largimin e vendit që ishte thelbësor në jetësimin e saj, ShBA-ve.
Macron tha se e respektonte vendimin e Trump për t’u larguar nga marrëveshja por se besonte se ky ishte një gabim. Pastaj Macron anashkaloi Presidentin Trump, për të folur drejtpërdrejt me kombin amerikan… “I know you are a great Nation…” dhe thirri të gjithë shkencëtarët, inxhinierët, sipërmarrësit dhe qytetarët e zhgënjyer të vijnë dhe të punojnë “këtu në Francë.” Sektori privat në Shtetet e Bashkuara të Amerikës ka investuar miljarda dollarë në zhvillimin e teknologjive të gjelbërta. Frika e privatëve është se ShBA-të do mbeten jashtë asaj që ata konsiderojnë si themelet e ekonomisë së të ardhmes. Më 26 Prill, 16 kompani amerikane, mes të cilave Apple, Google, BP, Shell dhe kompania e minierave BHB Billiton specifikuan arsyet pse Marrëveshja e Parisit do jetë e mirë kompanitë amerikane.
Presidenti Trump e tha qartë, “Ne po largohemi!” dhe shtroi argumentat e tij ekonomikë se kostot që ShBA kanë marrë përsipër në Marrëveshjen e Parisit janë të padrejta. Fjalimi i Trump ishte i bazuar mbi premisën e tij të përherëshme, ShBA-ve ua kanë hedhur të huajt. “Ne nuk duam që vendet e tjera të vazhdojnë të qeshin me ne.” - tha Trump gjatë fjalës së tij. Ai ka argumentuar më tej, se e gjithë kjo sakrificë nuk do t’ia vlejë barra qiranë. Trump u referohet disa raporteve që bëjnë llogaritë e kostove të zbatimit të marrëveshjes nga ShBA-të. Por kthesa drejt energjisë së pastër, të qenit udhëheqës botërorë në energjinë diellore, të erës dhe transportit të pastër do të ishte favorizuese për të ardhmen ekonomike të ShBA-ve.
Brenda Amerikës, konservatorët dhe ata që nuk besojnë në ndryshimet klimatike po festojnë. ShBA do të kursejë 3 trilion dollarë duke dalë nga kjo marrëveshje, do ruajë qindra mijëra vende vende pune dhe do ndalojë rritjen e kostove energjiitike për familjet amerikane. National Review shkruan se kjo lëvizje e afron Trump-in me bazën e tij punëtore, teksa Demokratët flasin për mbrojtjen e Planetit e të tjera çështje të padobishme kur vjen tek votat e “jakave blu.” Procesi i largimit të ShBA-ve nga Marrëveshja e Parisit do të jetë i gjatë, rreth katër vjet dhe do të finalizohej në ditën pas zgjedhjeve të ardhshme, ndaj dhe pritet të jetë një çështje e shumëdebatuar fushatën e ardhshme.
