Të djelën e shkuar, gjatë rrugës së kthimit nga Baku-ja kryeqyeti i Azerbajxhanit - pas një vizite triditëshe në Gjeorgji dhe Azeri, Papë Françesku u kap me librat shkollorë francezë që sipas tij propagandojnë “një indoktrinim tinëzar të Teorisë së gjinive”.
Në mikrofonin e një gazetareje që po e intervistonte në avion, Papa tregoi anekdotën që i ish rrëfyer nga një baba francez “… një katolik as ashtu as kështu, por sidoqoftë katolik”, i cili gjatë një dreke familjare kish pyetur djalin e tij 10-vjeçar çka kish dëshirë të bëhej kur të rritej dhe ky i fundit i paskësh thënë “të bëhem vajzë”.
Më tej, ky baba i skandalizuar kish zbuluar se ishin pikërisht librat e shkollës së të birit ku shpalosej kjo “Teoria e gjinive”( *), ndërkohë që ajo shkon ndesh me logjikën natyrore.
Për Papën" … të kesh prirje homoseksuale apo të duash të ndrrosh seksin është një gjë ndërkohë që ta mësosh këtë në shkollë është gjë tjetër… bëhet fjalë këtu për ndrrimin e mentaliteteve, për një kolonizim ideologjik", gjë që e kish përmendur dhe dënuar ndërkohë në Tbilisi si “një prej aspekteve të luftës botërore për të shkatërruar martesën”.
I pyetur një hap më tej, lidhur me qëndrimin që duhej mbajtur atëhere ndaj personave homoseksualë apo transseksualë, Papë Françeskut ju desh të shprehej se ato duheshin pritur, shoqëruar “… sikundër shoqëronte Krishti” dhe integruar sa më tepër të jetë e mundur. “… gjatë jetës sime si prift apo si peshkop, kam shoqëruar persona me tendenca, apo praktika homoseksuale dhe i kam afruar drejt Zotit. Disa prej tyre nuk arrijnë dot, por nuk i kam braktisur kurrë” siguroi ai gazetaren.
Bile Papa tregoi se kish marrë një letër nga një spanjoll që i tregonte se si kish vendosur të ndrronte seksin për t’u shëndruar në burrë. “… Ai u martua, ndrroi gjendjen civile dhe më shkroi këtë letër ku më thoshte se do të ishte një ngushëllim për të të vinte të më takonte bashkë me gruan. Unë i prita”.
* * *
E pyetur mbi këtë gjë, në studion e radios “France Inte_r" pak më vonë, Ministrja franceze e Arsimit Najat Vallaud Belkacem, u shpreh me keqardhje lidhur me “… një fjalë të thënë së paku lehtësisht dhe të pabazuar” dhe vlerësoi se Papa paskësh qenë “viktimë e një fushate çinformimi masiv të udhëhequr nga qarqe integriste…”. Me ç’rast, ajo e ftoi Sovranin papal të verifikonte ai vetë librat shkollorë dhe të shkonte "… të takonte në terren mësuesit e shkollave franceze_”, gjatë vizitave të tij të ardhshme.
______________________________________________
(*)Teoria e gjinive - sipas atyre që e dënojnë, bëhet fjalë për një teori që synon të fshijë çdo diferencë të natyrës biologjike apo shoqërore mes burrit dhe gruas. Ajo paskësh qenë futur në shkollë nëpërmjet teksteve dhe librave shkollorë. Të akuzuarit për përhapjen e një teorie të tillë mbrohen duke thënë se qëllimi i tyre është pikërisht njohja e mekanizmave shoqërorë që krijojnë pabarazinë mes burrit dhe gruas dhe aspak, mohimi i diferencave mes sekseve.