PËRPLASJE VIZIONESH dhe INTERESASH
Opinion nga Klodi Stralla
Kushdo që do të lexojë këtë status, ka të drejtë të mendojë se autori i saj është “infektuar” nga Teori konspirative. Është e drejta e tij t’a mendojë kështu.
Për mua, kriza e sotme, që ka përfshirë disa vende të rajonit tonë, ato që kancelaritë perëndimore i quajnë si “Ballkani perëndimor”, nuk ka të bëjë as me “zgjedhjet e lira” në Shqipëri, as me zgjedhjen e shqiptarit Telat Xhaferi si kryetar i Kuvendit në Maqedoni, dhe as me mosfirmosjen e “demarkacionit” nga qeveria e Kosovës me Malin e Zi. Për mua, kriza aktuale i ka rrënjët tek përplasja gjeopolitike, BE-SHBA-RUSI, në lidhje me vizionin dhe interesat për krijimin e“Jugosllavisë të re”.
Europianët, dhe veçanërisht politika franko-gjermane, ajo ruse, por edhe ajo e ish administratës amerikane, Klinton-Obama-Soros, janë për krijimin e “Jugosllavisë të re”, si një entitet politik, ekonomik e kulturor, që para se të integrohet në Europë (kismet, pas 20-25 vjet !), së pari të integrohet brenda vetes: Të krijojë një treg të përbashkët ekonomik, një rrjet rrugor të përbashkët, një sistem energjitik e telefonik të përbashkët, pak a shumë të bëhet një Konfederatë. Në dukje një model joshës, por që koha ka provuar se bashkime të tilla, multietnike, multikulturore, multifetare, por me diferenca të ndjeshme në zhvillim ekonomik, gjithmonë sundohen nga shteti më i fuqishëm e më i organizuar që, për mua, në rastin konkret, është Serbia.
Në Tiranë përfaqësuesi i kësaj linje është Edi Rama dhe Partia Socialiste, i cili, për të mbajtur sa më gjatë pushtetin, është toleruar të kanabizojë vendin dhe kriminalizojë politikën, duke përdorur retoriken e “vettingut”.
Nga ana tjetër janë amerikanët e Administratës të re, Trump. Unë mendoj se ata nuk e duan këtë bashkim artificial të sunduar nga sllavët. Ata duan që secilin shtet të këtij rajoni t’a kontrollojnë më vete. Natyrisht, amerikanët nuk kanë interesa ekonomike në rajon, interesat e tyre janë vetëm gjeostrategjike: bregdeti i Adriatikut dhe Jonit nuk duhet t’i lihet Serbisë, e pas saj Rusisë.
Në Tiranë përfaqësues i kësaj linje amerikane është Lulzim Basha dhe partitë e Opozitës, pavarësisht retorikës që përdoret, se problem janë zgjedhjet e lira dhe të nderçme.
Si do të zgjidhet kjo përplasje?
Nëse Rama dhe PS do të pranojë krijimin e Qeverisë teknike dhe një afat të arsyshëm për mbajtjen e zgjedhjeve të reja, kalimi i pushtetit do të bëhet i butë, pa trazira sociale. Në të kundërt, parshikoj kohe te zymta. Kjo varet nga loja e Të mëdhenjve - Kontinentit të vjetër dhe Kontinentit të ri të përtej oqeanit.