A keni ndonje shprehje tuajën origjinale?

Krijimi ekziston si ekulibër alternativ ndiz e fik fap-fup në çdo çast: fap digjet në Pavazhdushmëri e fup shuhet në Vazhdushmëri.

Nuk ka gabim në kuptimin negativ përveç se moral - i cili është destruktiv -, çdo lloj gabimi tjetër është një mundësi për krijim, ose me saktë mundësi për rikrijim rikonstruktiv. Këtë të vërtetë e njohin më mirë se të tjerët krijuesit, në mënyrë të të ndërgjegjshme apo të pandërgjegjshme qoftë, vetëm nëpërmjet gabimit dilet ngja gjëndja e harmonisë status quo të mëparshme. Në këtë mënyrë ka krijuar edhe Zoti. S’ka mënyrë tjetër.

Nuk ka mënyrë më të mirë për të bërë sherr me tjetrin, këtu dhe kudo qoftë, se sa të përmëndësh Zotin në koment ose në post.

abcdefghij

tvls :smiley:

Në një ambjent intelektualësh t’mdhej u hodh në mejdan pyetja provokuese: “A do deshironit të dinit datën e ditës kur do të lani hesapet me këtë botë?”. Kuptohet që reagimet ishin gjithfarsoj, dhe disa mjaft interesante, sepse frika nga vdekja është temë mjaft interesante për intelektualin postmodern, i cili megjithse është kudo post“ngambrapa”, e megjithatë e mohon që ka jetë ngambrapa jetës.

Komenti i të Modhit:

Të gjitha këto janë dokrra intelektuale të thëna për tu dukur si zgjuarsira, thellë thellë ne mendojme se nuk do të vdesim kurrë. Në fakt kjo është prova më banale, njëkohësisht më se e vërtetë, që e përtemja ekziston, që ka jetë ngambrapa jetës.

“Teoritë e komplotit” janë produkt i shpresës (hë për hë e kotë) që bota mund të kontrollohet, ose me fjalë tjera që bota është e kontrollueshme. Eshtë mizore me ja heq këtë shpresë njeriut.

Nuk ka njerëz që nuk kuptojnë, ka njerëz që nuk duan të kuptojnë, sepse nuhasin erën e rrezikut.
Kjo do të thotë që ekzistojnë mënyra të ndryshme të kuptuari, që përfshijnë edhe të moskuptuarit. Për këtë arsye nuk shqetsohem shumë kur komentet e mia nuk kuptohen.

Intelektualin e modh sa me tepër e shtyn (ose shtyhet prej konjukturave) drejt Qendrës, aq me tepër ai shkon drejt periferisë.

Intelektuali modern, e sidomos ngambrapa modern, eshte qenia me e pabese ne bote per arsye se eshte kunder besimit fetar.

Shenjtori nëpërmjet një sërë teknikash sakrifikuese: netëve pa gjumë në lutje të vazhdueshme, agjërimeve rraskapitëse, jetës sakrifikuese për tjetrin, etj, mundon trupin e vet, pra në plan të fundit shenjtori vret trupin e vet, asgjëson vetveten, vetvritet. Ndërsa krimineli asgjëson tjetrin.
Eshtë e njëjta forcë brutale në veprim, ndryshon vetëm kahu.
Në një shoqëri perfekte të dy figurat e lartpërmëndura nuk kanë asnjë arsye të ekzistojnë, nuk do të ndihet nevoja për ta.

Servilizmi është Përulësi e shtirur: së jashtmi duken se janë e njëjta gjë, së brendëshmi janë krejt të kundërta. Meqenëse dukja është mashtruese, për të parë ndryshimin duhet identifikuar motivimi dhe, në të njëjtën kohë, pasur nuhatje të fituar nga përvoja.

Në të njëjtin raport qëndrojnë çifti i kundërt dhe komplementar me to: Arroganca dhe Krenaria.

Me logjikë i bie që gjenitë, krahas të vërtetave gjeniale, të thonë edhe budallallëqe me okë përderisa thonë gjëra të kundërta me njëri tjetrin. Midis dy gjenive në sherr midis tyre për një çështje, të paktën njëri prej tyre i bije të jetë budalla.

Ka dy lloj psikopatie, psikopati e mirë dhe psikopati e keqe. Në të dy rastet personi ka ide dhe veprime anormale, por në rastin e parë anormaliteti është i motivuar kryesisht nga mirësia, ndërsa në rastin e dytë nga keqdashja. Ka edhe një rast të tretë psikopatie as mish e as peshk që furnizon me banorë purgatorin, por as që ja vlen të konsiderohet, vari hejbet, guarda e passa! si Poeti.

Trapllikun si veti shpirtërore e ndesh më tepër në intelektualin gegë, ndërsa në intelektualin toskë ndesh më tepër keqdashjen, dhe prandaj bandat intelektuale panshqiptare krijohen me vështirsi dhe shpërbëhen me lehtësi; nuk e kanë jetën të gjatë.
Nuk bëhet stan me lepuj! - thonë toskët, edhe për gegët.

“Pan” ka kuptimin e universales (psh pan-teizem), prejardhet nga perëndia pagane Pan, të cilit krishtërimi i veshi atributet e Satanit.
Me fjalë të tjera vetëm Shejtoni arrin t’i bëjë njerzit bashkë, hë pë hë.

Kulmi i absurditetit të botës është se Nënë Tereza (figura e shenjtorit) ndjehet fajtore për krimet e botës, ndërsa një serial killer ndjehet i pafajshëm si foshnjë e sapolindur.

1 Like

Baronit Mynhauzen rrëfen se njëherë ra megjithe kalë në një kënetë duke rrezikuar mbytjen. Por sidoqoftë ja arriti të dalë nga këneta duke u tërhequr prej flokëve të vet, madje arriti të nxjerrë edhe kalin e tij prej baltovine.

E njëjta rrëfenjë dëgjohet në eter prej intelektualit t’modh që del me forcat e veta nga llumi, madje nxjerr dhe atëmëmëdheun, pa asnjë ndihmë nga Lart.

A mund të banohet një planet nga vetëm një njeri?

Përgjigja është po, përderisa në Peshk diskuton pothuajse vetëm një njeri, e me sa duken bathët, “pothuajse vetëm një njeri” po bëhet “vetëm një njeri”.

Dizajni i vetures si llamarinë nga jasht është vetëm për t’i qerr paret klientit; dizajni i vërtetë shihet kur ngrihet kapaku e duket motori dhe rrokotellat e tij.