Po qarkullojnë këto ditë në shtyp, si formë talljeje disa lista ku parti të vogla kanë kandiduar fise të tëra, edhe njerëz me shumë pak arsim. Po gajasen shumë në Facebook dhe portale me këto lista, madje disa abuzojnë me tituj të llojit, “Ja profesionet e deputetëve: shofer, karrocier, arsim shtatëvjeçar”. Së pari, këta nuk janë deputetë por kandidatë që nuk do të zgjidhen kurrë, dhe së dyti, ata i kanë futur në ato lista, Berisha dhe Rama. Më lejoni të shpjegoj se si.
Kodi zgjedhor në Shqipëri i formuluar dhe zbatuar nga PS dhe PD është antidemokratik dhe socialistët dhe demokratët e dinë mirë këtë gjë sepse e kanë dashur kasten të tillë Antidemokratik. Për partitë e vogla dhe forcat e reja politike është shumë, shumë e vështirë pasi çdo kërkesë e ligjit elektoral është aty, jo për të mundësuar zgjedhje të lira, por si një pengesë që qytetarët të përfaqësohen jashtë klaneve tradicionale PS dhe PD.
Ç’do parti, sado e vogël, duhet të kandidojë në çdo cep të Shqipërisë, edhe në mos dashtë, me detyrim. Kështu, një parti e minoritetit maqedon duhet të ketë 34 kandidatë për deputetë në Tiranë, një parti e minoritet grek duhet të garojë edhe në Tropojë, një parti sado e re, duhet të çapëlehet me zor. Po vetëm për tu bërë pjesë e garës, duhen 5000 firma, me 5000 fotokopje të 5000 kartave të identitetit të firmosura nga 5000 mbajtësit e këtyre kartave.
Ndryshimi asokohe i kushtetutës u bë nga Berisha dhe Rama edhe për të eliminuar në tavolinë LSI-në, një fjasko që e bëri Ilir Metën kingmaker, edhe kjo si shumë të tjera të “shahistëve politik” shqiptarë që rregullisht shfaqin largpamësinë e urithit. Situata e sotme është ajo ku kryetarët vendosin për përfaqësimin, por nayrisht, askush nga njerëzit partiakë nuk flet për këtë, nga frika e ndëshkimit. Karriera politke është zëvendësuar me servilizëm. Ta lëmë me kaq se është ibret.
Për partitë e reja, siç shpjegon edhe Gjergj Erebara në një analizë tek reporter.al, “Kodi zgjedhor i hartuar nga Berisha dhe Rama dhe i votuar nga deputetët e tyre të parlament vendosi një skemë tjetër shumë diskriminuese ndaj alternativave politike të reja apo të vjetra. Kodi përcaktoi se nëse një parti vendoste, fjala vjen, të mos garonte vetë por të garonte në koalicion me një nga partitë e mëdha, jeta e saj lehtësohej menjëherë. Një parti në koalicion nuk ka nevojë të mbledhë 5 mijë firma për të fituar të drejtën për të garuar dhe nuk ka detyrimin që të kandidojë 140 deputetë në të gjithë Shqipërinë por vetëm gjysmën, d.m.th., 70…”.
Pra e vetmja mënyrë për të garuar si forcë e pavarur në Shqipëri është duke paraqitur 140 kandidatë. Të përgjedhësh 140 njerëz me CV-ra të shkëlqyera, dëshirë dhe guxim për tu futur në politikën e pistë shqiptare është e pamundur edhe për partitë e mëdha, jo më për të voglat të cilat nuk garantojnë dot fitoren. Ndaj dhe disa parti lokale, me bazë etnike apo kulturore e kanë të pamundur të gjejnë njerëz, ndaj mbushin listat me emrat e fisit. Nuk e bëjnë se duan, janë duke hedhur vallen lodrave të së cilës u bien Kryeministri aktual dhe ai që ish.
Megjithatë, disa ja kanë dalë, pas gjithë këtyre akrobacive e cirkut që kërkohet, qytetarët do të kenë mundësi të votojnë kësaj rradhe për parti të reja. Mungesa e koalicioneve, që janë stofi i hilesë së kodit zgjedhor aktual ka nxjerrë në pah sesa të vëshirë e kanë të garojnë realisht, parti që zakonisht u bashkoheshin mega Koalicioneve të udhëhequra nga PS dhe PD.
